2026-йил 19-октябрь куни Самарқанд шаҳрида C5+1 Ҳигҳ Левел Бусинесс Сессионс доирасида Ўзбекистон Республикаси Давлат активлари агентлиги ва Американинг “Auerbach Grayson” молия компанияси ўртасида ўзаро англашув меморандуми имзоланди.

Ҳужжат Ўзбекистонда давлат активларини хусусийлаштириш жараёнларига халқаро сармоядорлар, шу жумладан, АҚШ инвестиция компаниялари ва институционал инвесторларини жалб этиш, шунингдек, мамлакатнинг инвестициявий имкониятларини халқаро молия бозорларида кенг тарғиб қилишга қаратилган.

Эришилган келишувларга мувофиқ, Auerbach Grayson Агентликка хусусийлаштириш лойиҳаларида иштирок этишга қизиқиш билдирган салоҳиятли хорижий инвесторларни аниқлаш, улар билан ишбилармонлик алоқаларини ўрнатиш ҳамда Ўзбекистоннинг инвестициявий таклифларини илгари суришда кўмаклашади. Бунда АҚШ институционал инвесторлари ва молия институтлари билан ҳамкорликни кенгайтиришга алоҳида эътибор қаратилади.

Тадбир доирасида Давлат активлари агентлиги директори Соҳибжон Муродовнинг Auerbach Grayson президенти Нихил Бҳатнагар билан учрашуви бўлиб ўтди. Учрашувда томонлар Ўзбекистонда амалга оширилаётган иқтисодий ислоҳотлар, давлат активларини хусусийлаштиришнинг истиқболли йўналишлари ҳамда хорижий инвестицияларни жалб этиш механизмларини янада такомиллаштириш масалаларини муҳокама қилдилар.

1993-йилда Нью-Йорк шаҳрида ташкил этилган “Auerbach Grayson” компанияси институционал инвесторларга брокерлик хизматларини кўрсатиш ва уларнинг халқаро капитал бозорларига кириш имкониятларини таъминлашга ихтисослашган. Компания Ўзбекистон билан ҳамкорлик тажрибасига эга бўлиб, Ўзбекистон Миллий инвестиция жамғармаси (УзНИФ) акцияларини Лондон ва Тошкент фонд биржаларида халқаро бозорга чиқариш жараёнида ҳамкор ташкилотчилардан бири сифатида иштирок этган.

Меморандумнинг имзоланиши Ўзбекистоннинг хусусийлаштириш лойиҳаларига янги хорижий сармоядорларни жалб этиш, мамлакатда Америка инвестиция капитали иштирокини кенгайтириш ҳамда Ўзбекистоннинг халқаро молия бозорларидаги мавқеини мустаҳкамлаш бўйича амалий ҳамкорликни йўлга қўйиш учун асос яратади.